ओं देवपात्रं वै वषट्कारः यद् वषट्करोति देवपात्रेणैव तद् देवतास् तर्पयति अथो यद् आभितृष्यन्तीर् अभिसंस्थं तर्पयत्य् एवम् एव तद् देवतास् तर्पयति यद् अनुवषट्करोति तद् यथैवादो ऽश्वान् वा गा वा पुनरभ्याकारं तर्पयत्य् एवम् एव तद् देवतास् तर्पयति यद् अनुवषट्करोति इमान् एवाग्नीन् उपासत इत्य् आहुर् धिष्ण्यान् अथ कस्मात् पूर्वस्मिन्न् एवाग्नौ जुह्वति पूर्वस्मिन् वषट्करोति यद् एव सोमस्याग्ने वीहीत्य् अनुवषट्करोति तेनैव वषट्करोति धिष्ण्यान् प्रीणाति अथ संस्थितान् सोमान् भक्षयन्तीत्य् आहुर् येषां नानुवषट्करोति तद् आहुः को नु सोमस्य स्विष्टकृद्भाग इति यद् एव सोमस्याग्ने वीहीत्य् अनुवषट्करोति तेनैव संस्थितान् सोमान् भक्षयन्तीत्य् आहुः स उ एष सोमस्य स्विष्टकृद्भागो यद् अनुवषट्करोति ॥ १ ॥
oṃ devapātraṃ vai vaṣaṭkāraḥ yad vaṣaṭkaroti devapātreṇaiva tad devatās tarpayati atho yad ābhitṛṣyantīr abhisaṃsthaṃ tarpayaty evam eva tad devatās tarpayati yad anuvaṣaṭkaroti tad yathaivādo 'śvān vā gā vā punarabhyākāraṃ tarpayaty evam eva tad devatās tarpayati yad anuvaṣaṭkaroti imān evāgnīn upāsata ity āhur dhiṣṇyān atha kasmāt pūrvasminn evāgnau juhvati pūrvasmin vaṣaṭkaroti yad eva somasyāgne vīhīty anuvaṣaṭkaroti tenaiva vaṣaṭkaroti dhiṣṇyān prīṇāti atha saṃsthitān somān bhakṣayantīty āhur yeṣāṃ nānuvaṣaṭkaroti tad āhuḥ ko nu somasya sviṣṭakṛdbhāga iti yad eva somasyāgne vīhīty anuvaṣaṭkaroti tenaiva saṃsthitān somān bhakṣayantīty āhuḥ sa u eṣa somasya sviṣṭakṛdbhāgo yad anuvaṣaṭkaroti || 1 ||
Om. The vaṣaṭ call is the gods' vessel. When he makes the vaṣaṭ call, he satisfies the deities with the gods' vessel. As he satisfies those who are thirsty right through to the end, so he satisfies the deities when he makes the second vaṣaṭ call. And as he gives horses or cows their fill by pouring for them again, so he satisfies the deities by making the second vaṣaṭ call. They say that they tend these fires here, the hearths. Why, then, do they offer only in the forward fire and make the vaṣaṭ call over the forward fire? With the very words 'Agni, partake of Soma' that he uses for the second vaṣaṭ call, he makes the call and pleases the hearths. They say, 'One partakes of the Soma draughts brought to completion even where he makes no second vaṣaṭ call.' They ask, 'What is the maker of the well-offered sacrifice's share of Soma?' They say that with the very words 'Agni, partake of Soma' that he uses for the second vaṣaṭ call, they partake of the Soma draughts brought to completion. Thus the second vaṣaṭ call is the maker of the well-offered sacrifice's share of Soma.