॥ ईश्वर उवाच ॥ । ततो गच्छेन्महादेवि च्यवनार्कमनुत्तमम् ॥ । हिरण्यापूर्वभागस्थं च्यवनेन प्रतिष्ठितम् ॥ १ ॥
|| īśvara uvāca || | tato gacchenmahādevi cyavanārkamanuttamam || | hiraṇyāpūrvabhāgasthaṃ cyavanena pratiṣṭhitam || 1 ||
प्रभासक्षेत्र माहात्म्यम् · अध्यायः २७९
A chapter of the Skanda Purana.
22 versesSanskrit with transliteration
॥ ईश्वर उवाच ॥ । ततो गच्छेन्महादेवि च्यवनार्कमनुत्तमम् ॥ । हिरण्यापूर्वभागस्थं च्यवनेन प्रतिष्ठितम् ॥ १ ॥
|| īśvara uvāca || | tato gacchenmahādevi cyavanārkamanuttamam || | hiraṇyāpūrvabhāgasthaṃ cyavanena pratiṣṭhitam || 1 ||
सर्वकामप्रदं नृणां पूजितं विधिवन्नरैः ॥ । सप्तम्यां च विधानेन यः स्तोष्यति रविं नरः ॥ २ ॥
sarvakāmapradaṃ nṛṇāṃ pūjitaṃ vidhivannaraiḥ || | saptamyāṃ ca vidhānena yaḥ stoṣyati raviṃ naraḥ || 2 ||
अष्टोत्तरशतैर्नाम्नां सम्यक्छ्रद्धासमन्वितः ॥ । शृणु तानि महादेवि शुचिर्भूत्वा समाहितः ॥ ३ ॥
aṣṭottaraśatairnāmnāṃ samyakchraddhāsamanvitaḥ || | śṛṇu tāni mahādevi śucirbhūtvā samāhitaḥ || 3 ||
क्षणं त्वं कुरु देवेशि सर्वं वक्ष्याम्यशेषतः ॥ । धौम्येन तु यथापूर्वं पार्थाय सुमहात्मने ॥ ४ ॥
kṣaṇaṃ tvaṃ kuru deveśi sarvaṃ vakṣyāmyaśeṣataḥ || | dhaumyena tu yathāpūrvaṃ pārthāya sumahātmane || 4 ||
नामाष्टशतमाख्यातं तच्छृणुष्व महामते ॥ । सूर्योऽर्यमा भगस्त्वष्टा पूषाऽर्कः सविता रविः ॥ ५ ॥
nāmāṣṭaśatamākhyātaṃ tacchṛṇuṣva mahāmate || | sūryo'ryamā bhagastvaṣṭā pūṣā'rkaḥ savitā raviḥ || 5 ||
गभस्तिमानजः कालो मृत्युर्द्धाता प्रभाकरः ॥ । पृथिव्यापश्च तेजश्च खं वायुश्च परायणः ॥ ६ ॥
gabhastimānajaḥ kālo mṛtyurddhātā prabhākaraḥ || | pṛthivyāpaśca tejaśca khaṃ vāyuśca parāyaṇaḥ || 6 ||
सोमो बृहस्पतिः शुक्रो बुधोंऽगारक एव च ॥ । इन्द्रो विवस्वान्दीप्तांशुः शुचिः सौरिः शनैश्चरः ॥ ७ ॥
somo bṛhaspatiḥ śukro budhoṃ'gāraka eva ca || | indro vivasvāndīptāṃśuḥ śuciḥ sauriḥ śanaiścaraḥ || 7 ||
ब्रह्मा रुद्रश्च विष्णुश्च स्कन्दो वैश्रवणो यमः ॥ । वैद्युतो जाठरश्चाग्निरिंधनस्तेजसां पतिः ॥ ८ ॥
brahmā rudraśca viṣṇuśca skando vaiśravaṇo yamaḥ || | vaidyuto jāṭharaścāgniriṃdhanastejasāṃ patiḥ || 8 ||
धर्मध्वजो वेदकर्त्ता वेदांगो वेदवाहनः ॥ । कृतं त्रेता द्वापरश्च कलिः सर्वामराश्रयः ॥ ९ ॥
dharmadhvajo vedakarttā vedāṃgo vedavāhanaḥ || | kṛtaṃ tretā dvāparaśca kaliḥ sarvāmarāśrayaḥ || 9 ||
कलाकाष्ठामुहूर्त्ताश्च पक्षा मासा अहर्निशाः ॥ । संवत्सरकरोऽश्वस्थः कालचक्रो विभावसुः ॥ १० ॥
kalākāṣṭhāmuhūrttāśca pakṣā māsā aharniśāḥ || | saṃvatsarakaro'śvasthaḥ kālacakro vibhāvasuḥ || 10 ||
पुरुषः शाश्वतो योगी व्यक्ताव्यक्तः सनातनः ॥ । लोकाध्यक्षः प्रजाध्यक्षो विश्वकर्मा तमोनुदः ॥ ११ ॥
puruṣaḥ śāśvato yogī vyaktāvyaktaḥ sanātanaḥ || | lokādhyakṣaḥ prajādhyakṣo viśvakarmā tamonudaḥ || 11 ||
वरुणः सागरोंशुश्च जीवन्तो जीवनोऽरिहा ॥ । भूताश्रयो भूतपतिः सर्वभूतनिषेवितः ॥ १२ ॥
varuṇaḥ sāgaroṃśuśca jīvanto jīvano'rihā || | bhūtāśrayo bhūtapatiḥ sarvabhūtaniṣevitaḥ || 12 ||
स्रष्टा संवर्त्तको वह्निः सर्वस्यादिकरोऽमलः ॥ । अनंतः कपिलो भानुः कामदः सर्वतोमुखः ॥ १३ ॥
sraṣṭā saṃvarttako vahniḥ sarvasyādikaro'malaḥ || | anaṃtaḥ kapilo bhānuḥ kāmadaḥ sarvatomukhaḥ || 13 ||
जयो विषादो वरदः सर्वधातुनिषेवितः ॥ । समः सुवर्णो भूतादिः शीघ्रगः प्राणधारकः ॥ १४ ॥
jayo viṣādo varadaḥ sarvadhātuniṣevitaḥ || | samaḥ suvarṇo bhūtādiḥ śīghragaḥ prāṇadhārakaḥ || 14 ||
धन्वंतरिर्धूमकेतुरादिदेवोऽदितेः सुतः॥ । द्वादशात्माऽरविंदाक्षः पिता माता पितामहः ॥ १५ ॥
dhanvaṃtarirdhūmaketurādidevo'diteḥ sutaḥ|| | dvādaśātmā'raviṃdākṣaḥ pitā mātā pitāmahaḥ || 15 ||
स्वर्गद्वारं प्रजाद्वारं मोक्षद्वारं त्रिविष्टपम् ॥ । देहकर्त्ता प्रशांतात्मा विश्वात्मा विश्वतोमुखः ॥ । चराचरात्मा सूक्ष्मात्मा मैत्रेण वपुषाऽन्वितः ॥ १६ ॥
svargadvāraṃ prajādvāraṃ mokṣadvāraṃ triviṣṭapam || | dehakarttā praśāṃtātmā viśvātmā viśvatomukhaḥ || | carācarātmā sūkṣmātmā maitreṇa vapuṣā'nvitaḥ || 16 ||
एतद्वै कीर्तनीयस्य सूर्यस्यामिततेजसः ॥ । नाम्नामष्टोत्तरशतं प्रोक्तं शक्रेण धीमता ॥ १७ ॥
etadvai kīrtanīyasya sūryasyāmitatejasaḥ || | nāmnāmaṣṭottaraśataṃ proktaṃ śakreṇa dhīmatā || 17 ||
शक्राच्च नारदः प्राप्तो धौम्यस्तु तदनन्तरम् ॥ । धौम्याद्युधिष्ठिरः प्राप्य सर्वान्कामानवाप्तवान् ॥ १८ ॥
śakrācca nāradaḥ prāpto dhaumyastu tadanantaram || | dhaumyādyudhiṣṭhiraḥ prāpya sarvānkāmānavāptavān || 18 ||
एतानि कीर्तनीयस्य सूर्यस्यामिततेजसः ॥ । नामानि यः पठेन्नित्यं सर्वान्कामानवाप्नुयात् ॥ १९ ॥
etāni kīrtanīyasya sūryasyāmitatejasaḥ || | nāmāni yaḥ paṭhennityaṃ sarvānkāmānavāpnuyāt || 19 ||
सुरपितृमनुजयक्षसेवितमसुरनिशाचरसिद्धवंदितम् ॥ । वरकनकहुताशनप्रभं त्वमपि नम हिताय भास्करम् ॥ २० ॥
surapitṛmanujayakṣasevitamasuraniśācarasiddhavaṃditam || | varakanakahutāśanaprabhaṃ tvamapi nama hitāya bhāskaram || 20 ||
सूर्योदये यस्तु समाहितः पठेत्स पुत्रलाभं धनरत्नसंचयान् ॥ । लभेत जातिस्मरतां सदा नरः स्मृतिं च मेधां च स विंदते पुमान् ॥ २१ ॥
sūryodaye yastu samāhitaḥ paṭhetsa putralābhaṃ dhanaratnasaṃcayān || | labheta jātismaratāṃ sadā naraḥ smṛtiṃ ca medhāṃ ca sa viṃdate pumān || 21 ||
इमं स्तवं देववरस्य यो नरः प्रकीर्त्तयेच्छुद्धमनाः समाहितः ॥ । स मुच्यते शोकदवाग्निसाराल्लभेत कामान्मनसा यथेप्सितान् ॥ २२ ॥
imaṃ stavaṃ devavarasya yo naraḥ prakīrttayecchuddhamanāḥ samāhitaḥ || | sa mucyate śokadavāgnisārāllabheta kāmānmanasā yathepsitān || 22 ||
Keys: ← → turn the page, J K step through the verses.
Illustration: Verse & Place (Project-owned).