दशकम् ९७
Traiguṇyādbhinnarūpaṃ bhavati hi bhuvane …
॥
Ten-verse prayers to Krishna of Guruvayur retelling the Bhagavata Purana.
10 verses·Sanskrit with transliteration
त्रैगुण्याद्भिन्नरूपं भवति हि भुवने हीनमध्योत्तमं यत् ।
ज्ञानं श्रद्धा च कर्ता वसतिरपि सुखं कर्म चाहारभेदाः ।
त्वत्क्षेत्रत्वन्निषेवादि तु यदिह पुनस्त्वत्परं तत्तु सर्वं ।
प्राहुर्नैर्गुण्यनिष्ठं तदनुभजनतो मङ्क्षु सिद्धो भवेयम् ॥ १ ॥
traiguṇyādbhinnarūpaṃ bhavati hi bhuvane hīnamadhyottamaṃ yat |
jñānaṃ śraddhā ca kartā vasatirapi sukhaṃ karma cāhārabhedāḥ |
tvatkṣetratvanniṣevādi tu yadiha punastvatparaṃ tattu sarvaṃ |
prāhurnairguṇyaniṣṭhaṃ tadanubhajanato maṅkṣu siddho bhaveyam || 1 ||
त्वय्येव न्यस्तचित्तः सुखमयि विचरन्सर्वचेष्टास्त्वदर्थं ।
त्वद्भक्तैस्सेव्यमानानपि चरितचरानाश्रयन् पुंण्यदेशान् ।
दस्यौ विप्रे मृगादिष्वपि च सममतिर्मुच्यमानावमान ।
स्पर्धासूयादिदोषः सततमखिलभूतेषु संपूजये त्वाम् ॥ २ ॥
tvayyeva nyastacittaḥ sukhamayi vicaransarvaceṣṭāstvadarthaṃ |
tvadbhaktaissevyamānānapi caritacarānāśrayan puṃṇyadeśān |
dasyau vipre mṛgādiṣvapi ca samamatirmucyamānāvamāna |
spardhāsūyādidoṣaḥ satatamakhilabhūteṣu saṃpūjaye tvām || 2 ||
त्वद्भावो यावदेषु स्फुरति न विशदं तावदेवं ह्युपास्तिं ।
कुर्वन्नैकात्म्यबोधे झटिति विकसति त्वन्मयोऽहं चरेयम् ।
त्वद्धर्मस्यास्य तावत्किमपि न भगवन् प्रस्तुतस्य प्रणाश ।
स्तस्मात्सर्वात्मनैव प्रदिश मम विभो भक्तिमार्गं मनोझम् ॥ ३ ॥
tvadbhāvo yāvadeṣu sphurati na viśadaṃ tāvadevaṃ hyupāstiṃ |
kurvannaikātmyabodhe jhaṭiti vikasati tvanmayo'haṃ careyam |
tvaddharmasyāsya tāvatkimapi na bhagavan prastutasya praṇāśa |
stasmātsarvātmanaiva pradiśa mama vibho bhaktimārgaṃ manojham || 3 ||
तञ्चैनं भक्तियोगं द्रढयितुमयि मे साध्यमारोग्यमायु ।
र्दिष्ट्या तत्रापि सेव्यं तव चरणमहो भेषजायेव दुग्धम् ।
मार्कण्डेयो हि पूर्वं गणकनिगदितद्वादशाब्दायुरुच्चैः ।
सेवित्वा वत्सरं त्वां तव भटनिवहैर्द्रावयामास मृत्युम् ॥ ४ ॥
tañcainaṃ bhaktiyogaṃ draḍhayitumayi me sādhyamārogyamāyu |
rdiṣṭyā tatrāpi sevyaṃ tava caraṇamaho bheṣajāyeva dugdham |
mārkaṇḍeyo hi pūrvaṃ gaṇakanigaditadvādaśābdāyuruccaiḥ |
sevitvā vatsaraṃ tvāṃ tava bhaṭanivahairdrāvayāmāsa mṛtyum || 4 ||
मार्कण्डेयश्चिरायुस्स खलु पुनरपि त्वत्परः पुष्पभद्रा ।
तीरे निन्ये तपस्यन्नतुलसुखरतिः षट् तु मन्वन्तराणि ।
देवेन्द्रस्सप्तमस्तं सुरयुवतिमरुन्मन्मथैर्मोहयिष्यन् ।
योगोष्मप्लुष्यमाणैर्न तु पुनरशकत्त्वज्जनं निर्जयेत् कः ॥ ५ ॥
mārkaṇḍeyaścirāyussa khalu punarapi tvatparaḥ puṣpabhadrā |
tīre ninye tapasyannatulasukharatiḥ ṣaṭ tu manvantarāṇi |
devendrassaptamastaṃ surayuvatimarunmanmathairmohayiṣyan |
yogoṣmapluṣyamāṇairna tu punaraśakattvajjanaṃ nirjayet kaḥ || 5 ||
प्रीत्या नारायणाख्यस्त्वमथ नरसखः प्राप्तवानस्य पार्श्वं ।
तुष्ट्या तोष्टूयमानः स तु विविधवरैर्लोभितो नानुमेने ।
द्रष्टुं मायां त्वदीयां किल पुनरवृणोद्भक्तितृप्तान्तरात्मा ।
मायादुःखानभिज्ञस्तदपि मृगयते नूनमाश्चर्यहेतोः ॥ ६ ॥
prītyā nārāyaṇākhyastvamatha narasakhaḥ prāptavānasya pārśvaṃ |
tuṣṭyā toṣṭūyamānaḥ sa tu vividhavarairlobhito nānumene |
draṣṭuṃ māyāṃ tvadīyāṃ kila punaravṛṇodbhaktitṛptāntarātmā |
māyāduḥkhānabhijñastadapi mṛgayate nūnamāścaryahetoḥ || 6 ||
याते त्वय्याशु वाताकुलजलदगळत्तोयपूर्णातिघूर्ण ।
त्सप्तार्णोराशि मग्ने जगति स तु जले सम्भ्रमन्वर्षकोटीः ।
दीनः प्रैक्षिष्ट दूरे वटदलशयनं कञ्चिदाश्चर्यबालं ।
त्वामेव श्यामळाङ्गं वदनसरसिजन्यस्तपादाङ्गुलीकम् ॥ ७ ॥
yāte tvayyāśu vātākulajaladagal̤attoyapūrṇātighūrṇa |
tsaptārṇorāśi magne jagati sa tu jale sambhramanvarṣakoṭīḥ |
dīnaḥ praikṣiṣṭa dūre vaṭadalaśayanaṃ kañcidāścaryabālaṃ |
tvāmeva śyāmal̤āṅgaṃ vadanasarasijanyastapādāṅgulīkam || 7 ||
दृष्ट्वा त्वां हृष्टरोमा त्वरितमभिगतः स्प्रष्टुकामो मुनीन्द्रः ।
श्वासेनान्तर्निविष्टः पुनरिह सकलं दृष्टवान् विष्टपौघम् ।
भूयोऽपि श्वासवातैर्बहिरनुपतितो वीक्षितस्त्वत्कटाक्षै ।
र्मोदादाश्लेष्टुकामस्त्वयि पिहिततनौ स्वाश्रमे प्राग्वदासीत् ॥ ८ ॥
dṛṣṭvā tvāṃ hṛṣṭaromā tvaritamabhigataḥ spraṣṭukāmo munīndraḥ |
śvāsenāntarniviṣṭaḥ punariha sakalaṃ dṛṣṭavān viṣṭapaugham |
bhūyo'pi śvāsavātairbahiranupatito vīkṣitastvatkaṭākṣai |
rmodādāśleṣṭukāmastvayi pihitatanau svāśrame prāgvadāsīt || 8 ||
गौर्या सार्धं तदग्रे पुरभिदथ गतस्त्वत्प्रियप्रेक्षणार्थी ।
सिद्धानेवास्य दत्त्वा स्वयमयमजरामृत्युतादीन् गतोऽभूत् ।
एवं त्वत्सेवयैव स्मररिपुरपि स प्रीयते येन तस्मा ।
न्मूर्तित्रय्यात्मकस्त्वं ननु सकलनियन्तेति सुव्यक्तमासीत् ॥ ९ ॥
gauryā sārdhaṃ tadagre purabhidatha gatastvatpriyaprekṣaṇārthī |
siddhānevāsya dattvā svayamayamajarāmṛtyutādīn gato'bhūt |
evaṃ tvatsevayaiva smararipurapi sa prīyate yena tasmā |
nmūrtitrayyātmakastvaṃ nanu sakalaniyanteti suvyaktamāsīt || 9 ||
त्र्यंशेऽस्मिन्सत्यलोके विधिहरिपुरभिन्मन्दिराण्यूर्ध्वमूर्ध्वं ।
तेभ्योऽप्यूर्ध्वं तु मायाविकृतिविरहितो भाति वैकुण्ठलोकः ।
तत्र त्वं कारणाम्भस्यपि पशुपकुले शुद्धसत्त्वैकरूपी ।
सच्चिद्ब्रह्माद्वयात्मा पवनपुरपते पाहि मां सर्वरोगात् ॥ १० ॥
tryaṃśe'sminsatyaloke vidhiharipurabhinmandirāṇyūrdhvamūrdhvaṃ |
tebhyo'pyūrdhvaṃ tu māyāvikṛtivirahito bhāti vaikuṇṭhalokaḥ |
tatra tvaṃ kāraṇāmbhasyapi paśupakule śuddhasattvaikarūpī |
saccidbrahmādvayātmā pavanapurapate pāhi māṃ sarvarogāt || 10 ||
Keys: ← → turn the page, J K step through the verses.
Illustration: Verse & Place (Project-owned).