दशकम् ७७
Sairandhryāstadanu ciraṃ smarāturāyā
॥
Ten-verse prayers to Krishna of Guruvayur retelling the Bhagavata Purana.
12 verses·Sanskrit with transliteration
सैरन्ध्र्यास्तदनु चिरं स्मरातुराया ।
यातोऽभूः सललितमुद्धवेन सार्धम् ।
आवासं त्वदुपगमोत्सवं सदैव ।
ध्यायन्त्याः प्रतिदिनवाससज्जिकायाः ॥ १ ॥
sairandhryāstadanu ciraṃ smarāturāyā |
yāto'bhūḥ salalitamuddhavena sārdham |
āvāsaṃ tvadupagamotsavaṃ sadaiva |
dhyāyantyāḥ pratidinavāsasajjikāyāḥ || 1 ||
उपगते त्वयि पूर्णमनोरथां ।
प्रमदसम्भ्रमकम्प्रपयोधराम् ।
विविधमाननमादधतीं मुदा ।
रहसि तां रमयञ्चकृषे सुखम् ॥ २ ॥
upagate tvayi pūrṇamanorathāṃ |
pramadasambhramakamprapayodharām |
vividhamānanamādadhatīṃ mudā |
rahasi tāṃ ramayañcakṛṣe sukham || 2 ||
पृष्टा वरं पुनरसाववृणोद्वराकी ।
भूयस्त्वया सुरतमेव निशान्तरेषु ।
सायुज्यमस्त्विति वदेत् बुध एव कामं ।
सामीप्यमस्त्वनिशमित्यपि नाब्रवीत्किम् ॥ ३ ॥
pṛṣṭā varaṃ punarasāvavṛṇodvarākī |
bhūyastvayā suratameva niśāntareṣu |
sāyujyamastviti vadet budha eva kāmaṃ |
sāmīpyamastvaniśamityapi nābravītkim || 3 ||
ततो भवान्देव निशासु कासुचिन् ।
मृगीदृशं तां निभृतं विनोदयन् ।
अदादुपश्लोक इति श्रुतं सुतं ।
स नारदात्सात्त्वततन्त्रविद्बभौ ॥ ४ ॥
tato bhavāndeva niśāsu kāsucin |
mṛgīdṛśaṃ tāṃ nibhṛtaṃ vinodayan |
adādupaśloka iti śrutaṃ sutaṃ |
sa nāradātsāttvatatantravidbabhau || 4 ||
अक्रूरमन्दिरमितोऽथ बलोद्धवाभ्या ।
मभ्यर्चितो बहु नुतो मुदितेन तेन ।
एनं विसृज्य विपिनागतपाण्डवेय ।
वृत्तं विवेदिथ तथा धृतराष्ट्रचेष्टाम् ॥ ५ ॥
akrūramandiramito'tha baloddhavābhyā |
mabhyarcito bahu nuto muditena tena |
enaṃ visṛjya vipināgatapāṇḍaveya |
vṛttaṃ viveditha tathā dhṛtarāṣṭraceṣṭām || 5 ||
विघाताज्जामातुः परमसुहृदो भोजनृपते ।
र्जरासन्धे रुन्धत्यनवधिरुषान्धेऽथ मथुराम् ।
रथाद्यैर्द्योलब्धैः कतिपयबलस्त्वं बलयुत ।
स्त्रयोविंशत्यक्षौहिणि तदुपनीतं समहृथाः ॥ ६ ॥
vighātājjāmātuḥ paramasuhṛdo bhojanṛpate |
rjarāsandhe rundhatyanavadhiruṣāndhe'tha mathurām |
rathādyairdyolabdhaiḥ katipayabalastvaṃ balayuta |
strayoviṃśatyakṣauhiṇi tadupanītaṃ samahṛthāḥ || 6 ||
बद्धं बलादथ बलेन बलोत्तरं त्वं ।
भूयो बलोद्यमरसेन मुमोचिथैनम् ।
निश्शेषदिग्जयसमाहृतविश्वसैन्यात् ।
कोऽन्यस्ततो हि बलपौरुषवांस्तदानीम् ॥ ७ ॥
baddhaṃ balādatha balena balottaraṃ tvaṃ |
bhūyo balodyamarasena mumocithainam |
niśśeṣadigjayasamāhṛtaviśvasainyāt |
ko'nyastato hi balapauruṣavāṃstadānīm || 7 ||
भग्नस्स लग्नहृदयोऽपि नृपैः प्रणुन्नो ।
युद्धं त्वया व्यधित षोडशकृत्व एवम् ।
अक्षौहिणीः शिव शिवास्य जघन्थ विष्णो ।
सम्भूय सैकनवतित्रिशतं तदानीम् ॥ ८ ॥
bhagnassa lagnahṛdayo'pi nṛpaiḥ praṇunno |
yuddhaṃ tvayā vyadhita ṣoḍaśakṛtva evam |
akṣauhiṇīḥ śiva śivāsya jaghantha viṣṇo |
sambhūya saikanavatitriśataṃ tadānīm || 8 ||
अष्टादशेऽस्य समरे समुपेयुषि त्वं ।
दृष्ट्वा पुरोऽथ यवनं यवनत्रिकोट्या ।
त्वष्ट्रा विधाप्य पुरमाशु पयोधिमध्ये ।
तत्राथ योगबलतः स्वजनाननैषीः ॥ ९ ॥
aṣṭādaśe'sya samare samupeyuṣi tvaṃ |
dṛṣṭvā puro'tha yavanaṃ yavanatrikoṭyā |
tvaṣṭrā vidhāpya puramāśu payodhimadhye |
tatrātha yogabalataḥ svajanānanaiṣīḥ || 9 ||
पद्भ्यां त्वं पद्ममाली चकितिव पुरान्निर्गतो धावमानो ।
म्लेच्छेशेनानुयातो वधसुकृतविहीनेन शैले न्यलैषीः ।
सुप्तेनाङ्घ्र्याहतेन द्रुतमथ मुचुकुन्देन भस्मीकृतेऽस्मिन् ।
भूपायास्मै गुहान्ते सुललितवपुषा तस्थिषे भक्तिभाजे ॥ १० ॥
padbhyāṃ tvaṃ padmamālī cakitiva purānnirgato dhāvamāno |
mleccheśenānuyāto vadhasukṛtavihīnena śaile nyalaiṣīḥ |
suptenāṅghryāhatena drutamatha mucukundena bhasmīkṛte'smin |
bhūpāyāsmai guhānte sulalitavapuṣā tasthiṣe bhaktibhāje || 10 ||
एक्ष्वाकोऽहं विरक्तोऽस्म्यखिलनृपसुखे त्वत्प्रसादैककाङ्क्षी ।
हा देवेति स्तुवन्तं वरविततिषु तं निस्पृहं वीक्ष्य हृष्यन् ।
मुक्तेस्तुल्यां च भक्तिं धुतसकलमलं मोक्षमप्याशु दत्त्वा ।
कार्यं हिंसाविशुद्ध्यै तप इति च तदा प्रास्थ लोकप्रतीत्यै ॥ ११ ॥
ekṣvāko'haṃ virakto'smyakhilanṛpasukhe tvatprasādaikakāṅkṣī |
hā deveti stuvantaṃ varavitatiṣu taṃ nispṛhaṃ vīkṣya hṛṣyan |
muktestulyāṃ ca bhaktiṃ dhutasakalamalaṃ mokṣamapyāśu dattvā |
kāryaṃ hiṃsāviśuddhyai tapa iti ca tadā prāstha lokapratītyai || 11 ||
तदनु मथुरां गत्वा हत्वा चमूं यवनाहृतां ।
मगधपतिना मार्गे सैन्यैः पुरेव निवारितः ।
चरमविजयं दर्पायास्मै प्रदाय पलायितो ।
जलधिनगरीं यातो वातालयेश्वर पाहि माम् ॥ १२ ॥
tadanu mathurāṃ gatvā hatvā camūṃ yavanāhṛtāṃ |
magadhapatinā mārge sainyaiḥ pureva nivāritaḥ |
caramavijayaṃ darpāyāsmai pradāya palāyito |
jaladhinagarīṃ yāto vātālayeśvara pāhi mām || 12 ||
Keys: ← → turn the page, J K step through the verses.
Illustration: Verse & Place (Project-owned).