Skip to content

दशकम् ५१

Kadācana vrajaśiśubhiḥ samaṃ bhavān …

Ten-verse prayers to Krishna of Guruvayur retelling the Bhagavata Purana.

10 versesSanskrit with transliteration

Guruvayurappan, Krishna of Guruvayur.

कदाचन व्रजशिशुभिः समं भवान् वनाशने विहितमतिः प्रगेतराम् । समावृतो बहुतरवत्समण्डलैः सतेमनैर्निरगमदीश जेमनैः ॥ १ ॥

kadācana vrajaśiśubhiḥ samaṃ bhavān vanāśane vihitamatiḥ pragetarām | samāvṛto bahutaravatsamaṇḍalaiḥ satemanairniragamadīśa jemanaiḥ || 1 ||

Report an error

विनिर्यतस्तव चरणाम्बुजद्वयादुदञ्चितं त्रिभुवनपावनं रजः । महर्षयः पुलकधरैः कलेबरैरुदूहिरे धृतभवदीक्षणोत्सवाः ॥ २ ॥

viniryatastava caraṇāmbujadvayādudañcitaṃ tribhuvanapāvanaṃ rajaḥ | maharṣayaḥ pulakadharaiḥ kalebarairudūhire dhṛtabhavadīkṣaṇotsavāḥ || 2 ||

Report an error

प्रचारयत्यविरलशाद्वले तले पशून्विभो भवति समं कुमारकैः । अघासुरो न्यरुणदघाय वर्तनीं भयानकः सपदि शयानकाकृतिः ॥ ३ ॥

pracārayatyaviralaśādvale tale paśūnvibho bhavati samaṃ kumārakaiḥ | aghāsuro nyaruṇadaghāya vartanīṃ bhayānakaḥ sapadi śayānakākṛtiḥ || 3 ||

Report an error

महाचलप्रतिमतनोर्गुहानिभप्रसारितप्रथितमुखस्य कानने । मुखोदरं विहरणकौतुकाद्गताः कुमारकाः किमपि विदूरगे त्वयि ॥ ४ ॥

mahācalapratimatanorguhānibhaprasāritaprathitamukhasya kānane | mukhodaraṃ viharaṇakautukādgatāḥ kumārakāḥ kimapi vidūrage tvayi || 4 ||

Report an error

प्रमादतः प्रविशति पन्नगोदरं क्वथत्तनौ पशुपकुले सवात्सके । विदन्निदं त्वमपि विवेशिथ प्रभो सुहृज्जनं विशरणमाशु रक्षितुम् ॥ ५ ॥

pramādataḥ praviśati pannagodaraṃ kvathattanau paśupakule savātsake | vidannidaṃ tvamapi viveśitha prabho suhṛjjanaṃ viśaraṇamāśu rakṣitum || 5 ||

Report an error

गळोदरे विपुलितवर्ष्मणा त्वया महोरगे लुठति निरुद्धमारुते । द्रुतं भवान्विदलितकण्ठमण्डलो विमोचयन्पशुपशून् विनिर्ययौ ॥ ६ ॥

gal̤odare vipulitavarṣmaṇā tvayā mahorage luṭhati niruddhamārute | drutaṃ bhavānvidalitakaṇṭhamaṇḍalo vimocayanpaśupaśūn viniryayau || 6 ||

Report an error

क्षणं दिवि त्वदुपगमार्थमास्थितं महासुरप्रभवमहो महो महत् । विनिर्गते त्वयि तु निलीनमञ्जसा नभःस्थले ननृतुरथो जगुस्सुराः ॥ ७ ॥

kṣaṇaṃ divi tvadupagamārthamāsthitaṃ mahāsuraprabhavamaho maho mahat | vinirgate tvayi tu nilīnamañjasā nabhaḥsthale nanṛturatho jagussurāḥ || 7 ||

Report an error

सविस्मयैः कमलभवादिभिः सुरैरनुदृतस्तदनु गतः कुमारकैः । दिने पुनस्तरुणदशामुपेयुषि स्वकैर्भवानतनुत भोजनोत्सवम् ॥ ८ ॥

savismayaiḥ kamalabhavādibhiḥ surairanudṛtastadanu gataḥ kumārakaiḥ | dine punastaruṇadaśāmupeyuṣi svakairbhavānatanuta bhojanotsavam || 8 ||

Report an error

विषाणिकामपि मुरळीं नितम्बके निवेशयन्कबळधरः कराम्बुजे । प्रहासयन्कलवचनैः कुमारकान् बुभोजिथ त्रिदशगणैर्मुदा नुतः ॥ ९ ॥

viṣāṇikāmapi mural̤īṃ nitambake niveśayankabal̤adharaḥ karāmbuje | prahāsayankalavacanaiḥ kumārakān bubhojitha tridaśagaṇairmudā nutaḥ || 9 ||

Report an error

सुखाशनं त्विह तव गोपमण्डले मखाशनात्प्रियमिव देवमण्डले । इति स्तुतस्त्रिदशवरैर्जगत्पते मरुत्पुरीनिलय गदात्प्रपाहि माम् ॥ १० ॥

sukhāśanaṃ tviha tava gopamaṇḍale makhāśanātpriyamiva devamaṇḍale | iti stutastridaśavarairjagatpate marutpurīnilaya gadātprapāhi mām || 10 ||

Report an error

Illustration: Verse & Place (Project-owned).